Expect little. Dream big.

而家系3點鐘，啱翻沖完涼，喺我極度眼瞓嘅時候仲可以寫低呢篇嘢，我覺得這撐下去的力量也只有主才能賜給我。今日去左香港，本來系諗住聽佈道會。2月份無意中喺蔡少芬嘅微博度睇到六月份香港有個“紅黑皇”佈道會，一直好想去。之後喺微博度問蔡少芬同一個牧師點樣可以攞到飛，ADA冇答我啦，但系有其他嘅姊妹覆我，令我知道左某D途經。之後上佢地嘅網頁睇到話要down form申請。申請左一個月，都冇電話通知我。諗住應該冇噶啦。點知某一日，我唔知做乜鬼上郵箱（平時系唔會上嘅），就發現前一日佈道會嘅弟兄re左我email,話ok。仲問我幾時過去攞，而好好彩地，我可以好方便咁喺今日先攞。

好流水帳系咪？但系都為左顯明神嘅恩典。

尋晚hy又喺圍脖發現千嬅今日有太陽計劃（我嗰個俾封殺左嘛~所以系佢睇到囖），於是又撞撞下咁去，本來諗住系遠觀。後尾發現原來可以好近好近，我就離佢三四米咁睇佢做訪問，仲有基仔，睇到眼都定曬。今日冇帶相機，冇帶cd，連本稍微好樣小小嘅薄都冇帶喺身，真系簽名都唔知簽去邊。但我諗，冇帶相機亦唔系咩壞事，我越來越鍾意用眼睇，多過用鏡頭睇。只有用眼去睇，我先會感受到我地系處於同一個空間裏面，我地之間隔住人，隔住幾米，隔住空氣，嗰種正常嘅透視話我知佢真系距離我幾米，嗰個系真實嘅距離。而唔系通過鏡頭將人放大，好似睇電視咁。睇千嬅個頭嘅size會大過電視個頭囖（唔系話佢頭大，只系話好近姐~）千嬅真系千嬅，同電視嗰個一樣。呢種感覺好奇妙。
我相信，呢個偶然嘅機會亦系上帝賜俾我嘅。

講翻張飛，系the ticket,唔系成面鬚嗰個。我同hy同梁敏敏系分開行嘅，梁敏敏又冇電話，我同hy又遲到，但系最終我地都會合左，仲坐到靚位添。

今晚嘅show系森美同祖藍主持，佢地話“呢場唔系tvb嘅show，雖然都系三只色”。紅系代表藝人，黑代表前黑社會，黃代表皇家警察。紅亦代表愛，黑代表罪，黃代表救贖。有好多藝人，好多搞笑嘅金句。有蔡少芬同佢老公啦，關心妍，張敬軒，Steven，鄧萃雯，張堅庭，霜天蛾and so on. 張堅庭話：「擔屎唔偷食？你地有冇見過擔屎偷食嘅人先？所以你地個個都系擔屎唔偷食嘅，呢個世界都仲幾好噶。」又話佢地信耶穌之後，摸佢老婆個頭氹下佢老婆，佢老婆就會感到好幸福，其實佢只系用摸狗嘅力姐。講笑啦~  好多以前食白粉嘅黑社會嘅，靠主擺脫左白粉，好多做左社工，仲有設計師，音樂師等等。靠著主，佢地得到新嘅生命。

真系講左好多廢話。

今晚亦流左好多眼淚，一開場關心妍唱amazing grace就喊，唔知點解睇住D勁舞 hiphop都會喊。其實我而家已經系極少會喊。但系，我卻經常因為主耶穌嘅感動而流眼淚，我知道系從主而來嘅感動。中間，唱到一首歌嘅時候，唔知做乜鬼，又喊到filifele，越嚟越勁，直頭抽搐，震曬，我預左我會喊，但唔知喊到咁勁。嗰時我只系諗住，主耶穌佢真系好愛好愛我，上帝真系好愛好愛我。喺我最困難嘅時候，系佢安慰我，幫助我，系佢令我感受到真正嘅愛，呢種愛系一種無條件嘅愛。「在我是罪人時你送我中保」呢個中保就系主耶穌，當我地仲系罪人嘅時候，主耶穌就為我地嘅罪被釘喺十字架，佢系無罪嘅，系聖潔嘅，但系，一個聖潔嘅人居然為左我，呢個咁微不足道嘅罪人被釘死。釘死系咩概念？真系用大鐵釘將你嘅手腳就咁好似釘張紙咁釘喺十字架，直到D血流乾而死。試問仲好邊個可以做到咁？！呢個世界上就算冇人再愛你，你知道你天上嘅父將會永遠愛著你，你系佢最最寶貝嘅兒女，佢會永遠抱住你。

我哋的確有好多好多嘅罪。我地鍾意講大話，慕虛榮，妒忌，猜度，我哋會睇人唔順眼，會怨恨，貪心等等等等。
我亦知道我做得好唔夠，我希望主耶穌賜我耐心，賜我善良，賜我勇氣，賜我力量，我希望我可以將福音廣傳開去，我希望可以傳俾身邊嘅人，而我一直信心不足亦做得唔夠，我希望主可以帶領我，使用我，讓我帶你地去認識主。我有好多朋友，會對基督教有興趣，但好似蜻蜓點水，我唔知點樣先可以讓你地在主嘅愛裏面立根基，再好好地成長，開花，結果。我希望主可以帶領。信靠主耶穌真系好好，佢系我地隨時嘅幫助。好多人唄住重擔，好辛苦，可能系學習嘅工作嘅感情嘅生活嘅。但系話俾你知，只要你信靠主耶穌，只要你求佢，佢就會幫你唄，佢會幫你解決，叫你一身輕鬆。我就系咁樣，以前我會覺得我要做到最好，又要做好多嘢，逼自己做好系一件好難嘅事，就成日擔心啦，掛住啦。但而家我會將重擔都交俾主，佢會超過我所求所想去完成。但并唔系叫我唔洗做，而系我會向主尋求力量，佢賜俾我嘅力量系夠我用嘅。你要唄50斤嘅嘢，佢就會俾51斤嘅力量你。好多人認為，基督徒系唔系唔洗做就祈禱就有飯食先。唔系，祈禱系要從主得到力量，然後做更大的功。世間有太多太多事不由我地控制，當你承認你自己能力嘅不足，就系謙卑，我地迫切需要從主而來嘅幫助，而佢一定會幫助你。

真系講左好多好多「耶穌」。總之，主會使你嘅生命得到改變，而且系一個好好嘅改變。我覺得好奇怪，基督徒傳福音，唔系為左「積德」噶。而系我地真系想身邊嘅人好，真系想佢地信，想你地信。基督徒最開心嘅事，就系又有一個人接受主耶穌做佢生命嘅救主，哪怕系陌生人。呢D就系愛，從主而來嘅愛。

好多人覺得基督徒好煩，「點解成日都要同我講耶穌啊？我信唔信系我嘅事。」你古我唔覺得煩噶？加上我系一個超級怕煩嘅人。可以用一個字解決嘅我唔會講兩只字，一次搞掂嘅我唔會講兩次。我真系好欠缺耐性，我希望主可以俾我。因為我真系好希望你地可以信佢。
點解呢個世界上有D咁筍嘅嘢你都唔要呢？又唔洗錢。聖經話，只要你祈求，就得著。叩門，就開門，尋找，就尋見。

唔知你有冇睇完呢篇又長又煩又有D肉麻嘅嘢呢？如果對基督教有疑問或者有興趣嘅都可以搵我。有野要祈禱嘅都可以搵我。

佈道會嘅視頻出左嘅話，我會擺link ,好值得睇，搞笑又感動。
首先呢條系佈道會網址嘅linkhttp://www.awe.org.hk/

足足寫左一個鐘，我終於可以無愧于自己地瞓了。nite!
god bless you!唔系貪口爽隨口up噶。